Менің кәсіби жолым: Дінтану – өмірлік таңдауым

Әл-Фараби атындағы ҚазҰУ-нің, дінтану мамандығының

1-курс докторанты Алимгожинова М.С.

Мамандық таңдау – әр адамның өміріндегі маңызды шешімдердің бірі. Мен өз жолымды мектепті тәмамдағаннан кейін-ақ анықтадым: 11-сыныптан кейін Қазақстандағы жетекші оқу орындарының бірі – әл-Фараби атындағы Қазақ ұлттық университетіне «Дінтану» мамандығы бойынша оқуға түстім.

Дінтану – тек діни сенімдерді зерттеу ғана емес, ол адамзат өркениетінің маңызды құрамдас бөлігі болып табылатын діннің тарихы, философиясы, әлеуметтануы мен психологиясын кешенді түрде қарастыратын ғылым. Бұл саланы таңдауыма білімге деген қызығушылығым, мәдениеттер мен сенімдердің алуан түрлілігін тереңірек түсінуге деген ұмтылысым себеп болды.

Университеттегі оқу жылдарымда діндер тарихын, олардың қоғамға ықпалын, діни сананың психологиялық аспектілерін зерттеу арқылы өзімнің осы саладағы орнымды тапқанымды түсіндім. Дінтану маған тек теориялық білім беріп қана қоймай, әртүрлі көзқарастарды салыстыруға, зайырлылық пен сын тұрғысынан ойлауды дамытуға көмектесті.

Қазіргі таңда мен әл-Фараби атындағы ҚазҰУ-дың докторантурасында білім алып жатырмын. Докторантура – ғылым жолындағы жаңа белес. Менің ғылыми жұмысым қазіргі қоғамдағы өзекті мәселелердің бірі – дінаралық қатынастар және олардың психологиялық аспектілері туралы.

Мен өз мамандығыммен мақтанамын. Дінтану – тек ғылым ғана емес, қоғамдағы өзара түсіністік пен бейбітшілікті нығайтуға ықпал ететін маңызды сала. Болашақта алған білімім мен тәжірибемді Қазақстандағы діни толеранттылық пен мәдениетаралық диалогты дамытуға арнағым келеді.

Әр адам өз жолын өзі таңдайды. Мен үшін ол – дінтану.

*Партнёрский материал